Kapin 30 ka karosa gilaumang moapil sa Walk with Mary

CEBU, Philippines — Kapin sa 30 ka karosa sa mga nagakdaiyang titulo sa birhen ang gipaabot nga moapil sa ipahigayon nga Walk with Mary subay sa birthday sa Mahal nga Birhen karon Septiyembre 8, 2019.

Ang Walk with Mary manukad diha sa Fuente Osmeña ug taposon sa usa ka Santos nga Misa diha sa Plaza Independencia.

Matud ni John Vincent Taniola, presidente sa Children of Mary-Vicentian Marian Youth Archdiocesan Council nga subsob ang ilang pagpangandam karon uban sa mga nagkadaiyang ahensiya sa kagamhanan lakip ang mga layko alang sa pagpahigayon sa maong kalihukan.

Gibutyag ni Taniola nga alas 3:00 sa kadlawon ang assembly diha sa Fuente ug alas 4:00 sa kadlawon ang pagsugod sa lakaw padulong sa Plaza Independencia uban sa mga karosa gikan sa mga nagkadaiyang parokya.

Ug pipila ka adlaw sa dili pa ang kalihukan adunay ipagawas nga giya alang sa publiko lakip sa mga mokuyog sa Walk with Mary.

Atol sa gipahigayon nga coordination meeting kagahapon gipahimangnoan ug gihatagan usab ug guidelines ni PJ Ghunner Balasabas ang mga parokya ug organisasyon nga modala sa ilang mga karosa nga moapil sa Walk with Mary. (/BDB)(BANATNEWS)