CEBU, Philippines – Dul-an sa kinse ka mga tawo ang naangol atol sa panagbangga sa usa ka multicab ug hi-ace van sa may M.L Quezon, National Highway, Barangay Ibo ning Dakbayan sa Lapu-Lapu, kagahapon sa buntag.
Ang Hi-ace Van gimaneho ni Albert Contratista nga padung unta maghatud sa walo ka mga Japanese nationals ngadto sa Mactan Cebu International Airport samtang ang multicab gimaneho ni Jefferson Dayoday nga nagdala og mga pasaherong trabahante sa MEPZ gikan sa Cordova. Matud pa ni Police Senior Master Sergeant Dennis Singson, Desk officer sa Lapulapu Police Station pag-abot sa maong lugar nakatulog si Contratista sa pagmaneho hinungdan nikawat kini ug linya nga niresulta sa pagkasampak sa gimeneho ni Dayaoday.
Sumala pa ni Singson si Dayoday napiit ug pagkaangol usab sa mga pasahero nga sila si Melrose Peconalla, 22anyos, taga Bangbang Cordova, Arthur Berame, 28anyos, taga Babag Lapu-lapu, Remvi Andales, San Miguel Cordova, Ma. Fiel Boctot, 24anyos, ug Ryan Canete, 29anyos, taga Pilipog Cordova, kinsa puros nalandig sa pribado nga tambalanan sa lapu-lapu.
Gitug-an ni Singson, ang mga langyaw nga hapon nga sakay ni Contratista, ang nakalarga ra usab kay mga minor lang nga kadaut ang naangkon niini, samtang si Contratista anaa nalandig sa Vicente Sotto Memorial Medical Center.
Padayon pa nihimo ug imbestigayon ang ilang imbestigador may kalabutan sa maong insidente. Dako ang pagtuo ni Singson, nga kusog gayud ang dagan sa van tungod kay dugay naibot ang drayber sa multicab nga nabanggaan niini. (/IBM)(BANAT NEWS)