C-LOSAP andam nang modawat og drug user
CEBU, Philippines — Ang buhatan sa City of Lapu-Lapu Office for Substance Abuse Prevention (C-LOSAP) ug ingon man ang City Anti-Drug Abuse Council (CADAC) sa maong dakbayan ang andam na sa pagdawat niadtong mga nalambigit sa paggamit sa ilegal nga drugas nga nagtinguha sa pagbag-o pinaagi sa ilang pagahimuon nga pag-rehab niini.
Aron sa pagsugod sa maong programa ang executive special assistant on anti-drug abuse substance nga si Gary Lao nipahibalo kang Judge Joseph Stephen Ignacio sa Regional Trial Court (RTC) nga nagbase sa maong siyudad nga andam na sila sa pagdawat og mga drug user nga ilang ipaubos sa counseling ug rehabilitation ubos sa ilang pasiugdahan nga Community Based Rehabilitation program pinaagi usab sa outpatient care services nga ilang pagahimuon.
Matud ni Lao nga modawat usab sila og gi-refer sa mga pribadong kompaniya ug ingon man sa mga walk-in-clients nga nagtinguha sa pagbag-o sa ilang kaugalingon. Sa laing bahin ang kapolisan sa Dakbayan sa Danao ang kasamtangan karong nihingusog sa ilang kampaniya sa Kabataan Kontra Druga ug Terorismo pinaag sa ilang paglibot sa mga tulunghaan sa maong dakbayan. Si Police Lieutenant Maribel Getigan, hepe sa Danao City Police Station ang nipasiugda sa mao nilang kalihukan. (/BDB)(BANATNEWS)
- Latest