CEBU, Philippines — Dulan sa P2 milyones nga balor sa drugas ang nasakmit atol sa duha ka buy bust operations nga gihimo sa kapulisan sa Dakbayan sa Sugbo.
Unang operation nahitabo sa may Sitio San Miguel, Barangay Apas Huwebes sa gabii nga gikasikop ni Jovanne Cabuenas, alyas Bani, 29, high value target ug residente sa maong lugar.
Nangulo sa maong hiniusang operation mao si Police Lieutenant Mariel Ann Piedad ug Police Lieutenant Colonel Glenn Mayam uban sa pakig-alayon sa PDEA7.
Nasakmit gikan sa dinakpan ang mga pinutos sa ginadili nga drugas nga motimbang og P100 grams nga mobalor og P680 mil base sa Dangerous Drug Board Value ug ang buy bust money.
Ikaduhang operation nahitabo kagahapon sa kaadlawon diha sa Buhisan Road, Barangay Buhisan. Nadakpan si Lorlando Virgil Ongos, 32, nalakip sa watchlist ug taga Sitio Lower Puti sa maong barangay.
Nasakmit gikan kaniya ang duha ka dagkong putos sa gituohang shabu nga gibana-bana motimbang og 200 gramos nga mobalor P1,360,000.00 base sa Dangerous Drug Board Value, ug ang buy bust money.
Sa laing operasyon, nadakpan sa akto ang unom ka tawo diin upat ka mga lalaki ug duha ang mga babaye sa gihimo nga anti- illegal drug operations sa kapolisan sa Presinto 3 sa Lapu-Lapu City Police Office (LLCPO) sa Purok Balanghoy, Barangay Gun-ob, Dakbayan sa Lapu-Lapu.
Si Police Major Wayne Magbanua miila sa mga suspek nga sila si Emilio Noel, 24, car mechanic, Matt Anthony Suazo, 26, call center agent nga pulos nagpuyo sa maong dapit ug Matt Anthony Suazo, 19, taga Urgello sa Dakbayan sa Sugbo.
Samtang ang tulo ka mga babaye mao sila si Joan Tampus, 26, Maria Ellen Yoshimura, 54, ug Nancy Geonzon, 24, taga Barangay Ibo sa mao gihapong dakbayan.
Matud pa ni Magbanua si Noel ang ilang target apan naatlan nila ang uban nga nanuyop sa dapit maong giapil sila og dakop.
Nasakmit gikan kanila ang napulo ka gagmay nga paketeng shabu, mga drug paraphernalia, buy bust money nga P300 ug gituohang halin nga P1,600.
Ang mga dinakpan pasakaan nila og kaso nga kalapasan sa Republic Act 9165 o Comprehensive Dangerous Drug Act of 2002. (Romeo T. Limpangog/IBM)(BANATNEWS)