PDAF sa Lapu-Lapu ipauli sa COA
CEBU, Philippines – Giawhag sa Commission on Audit ang kagamhanan sa Dakbayan sa Lapu-Lapu sa pag-uli sa nahabilin nga pundong salapi gikan sa Priority Development Assistance Fund sa mga kongresista.
Kini naglakip kang kanhi kongresista Arturo Radaza nga mobalor og P24.7 milyones sa tuig 2010 ngadto sa tuig 2013 samtang si kanhi kongresista, karon konsehal sa Dakbayan sa Mandaue, Nerissa Soon-Ruiz, adunay mokabat sa P344,881.
Gipauli sa COA ang wala nagamit nga PDAF human kini gideklarar sa Korte Suprema nga “unconstitutional” ang paggahin niini ngadto sa mga magbabalaud.
Si Lapu-Lapu City Accountant Helen Dungog niingon nga nahimo na nila ang pag-uli sa mokabat P23.3 milyones ngadto sa Bureau of Treasury samtang ang mokabat sa P7 milyones ang gibilin alang sa mga beneficiaries sa scholarship program sa kagamhanan sa dakbayan.
Dugang pa ni Dungog nga ang mga beneficiaries nga mga tinun-an sa kolehiyo ang nagtungha sa mga unibersidad sa Dakbayan sa Sugbo hinungdan nga ilang gipangayo ang tambag sa COA labot niini sanglit sagad sa maong mga tinun-an wala pa man mogradwar sa ilang pagtungha. (/GMR)(BANAT NEWS)
- Latest