CEBU, Philippines — Miabot sa 151 porsiyento ang pagsaka sa kaso sa dengue karong tuiga kon itandi sa milabay nga tuig.
Ang maong datos basi sa talaan sa Central Visayas Center for Health Development Regional Epidemiology and Surveillance Unit diin sa pagkakaron aduna nay 9, 594 ka kaso ug 62 na ang namatay samtang sa milabay nga tuig adunay 3,823 ka kaso ug 25 ang namatay.
Nag-unang lima ka mga lugar sa rehiyon nga adunay daghan nga kaso sa dengue mao ang Cebu City, Lapu-Lapu City, Mandaue City, Danao City ug Dumaguete City.
Sa Lalawigan sa Sugbo, moabot na sa 17 ang namatay gumikan sa dengue sa unang kapin unom ka bulan niining tuiga.
Basi kini sa datos gikan sa Provincial Health Office diin moabot na sa 3, 376 ang kaso gikan sa bulan sa Enero hangtud sa ika-duhang semana sa bulan sa Hulyo.
Ang Dakbayan sa Toledo maoy adunay labing daghan nga natala sa patay nga moabot sa tulo, gisundan kini sa Balamban ug San Remigio nga tag duha ug tag usa sa Dakbayan sa Bogo ug Danao ug sa mga lungsod sa Santa Fe, Tuburan, Pinamungajan, Bantayan, Daanbantayan, Consolacion ug Alegria.
Matod ni Sheila Faciol ang Officer -in-Charge sa Provincial Health Office (PHO) nga gipangandaman na daan nila nga mosaka ang kaso sa dengue karong tuiga tungod sa na-obserbaran nga adunay trend nga matag tulo ka tuig mosaka ang kaso sa dengue.
Matud ni Faciol nga kon adunay kalit nga pagsaka sa kaso sa mga lungsod, automatic nga i-activate ang dengue fast lane sa 16 ka provincial ug district hospitals sa lalawigan.
Human mideklarar ang Department of Health og National Dengue Alert ang DOH-7 mihimo sab og mga lakang aron batukan ang sakit nga dengue nga mogara panahon sa ting-uwan.
Matud ni DOH-7 regional director Jaime Bernadas, ang pagpanglimpyo ra gayud maoy sulbad aron malikay sa dengue virus hinungdan nga ilang gihangyo ang katawhan nga kanunay gayud sa pagpanglimpyo.
Nunot niini si Bernadas miingon nga gitutokan nila ang pag-organize og Barangay Dengue Brigade aron pagsabwag og impormasyon sa katawhan nga sila makasabot kon unsa ang dengue, unsay angay likayan ug unsay mga sinyales ug sintomas sa maong sakit.
Prayoridad nila ang pagpahibalo kon unsaon pagbatok sa sakit pinaagi sa mga opisyales sa barangay, lokal nga kagamhanan ug mga volunteer health workers. (DILT) (BANAT NEWS)