Umento sa barangay incentives giduso na sa PB

CEBU, Philippines — Gitun-an na sa hunta probinsiyal ang  ordinansahon tumong sa pag-umento sa incentives sa mga kawani sa barangay sa lalawigan.

Ang ordinansahon gipangamahanan ni Bokal Glenn Anthony Soco kinsa mao sab ang chairman sa committee on budget and appropriations sa hunta probinsiyal.

Ang komitiba ni Soco tabangan sa committee on barangay affairs and rural development, committee public health and social services, ug committee on public safety, peace and order and dangerous drugs abuse prevention sa pagtuki sa maong ordinansahon.

Giduso nga mahimong P4,000 ang sa mga kwalipikado nga barangay health workers, nutrition scholars, animal health aides ug barangay day care center volunteers gikan sa P2,400 nga honorarium matag tuig.

Samtang ang mga barangay tanod umentohan og dugang P1,500 nga incentives gikan sa P1,500 nga honorarium matag tuig.

Si Gobernador Gwendolyn Garcia una na nga nagkanayon nga iyang umentohan ang honoraria sa mga kawani sa barangay sanglit sa iya pang panahon pagka-gobernador kaniadto ang maong kantidad ug angay na patas-an.

Plano sa gobernador nga i-apod-apod ang maong incentives sa buwan sa Disyembre aron magamit sa Pasko sa mga mga kawani sa barangay. (BANAT NEWS)