CEBU, Philippines – Usa ka bana ang naghikog human wala hatagi sa iyang asawa og P10 mil aron ibayad sa online gambling game. Naghikog gamit ang pisi ang 49-anyos nga si Eleno Gelera sa ilang panimalay sa Sitio Summer, Brgy. Inayawan, Dakbayan sa Sugbo niadtong Lunes sa kaadlawon.
Matud sa asawa niini nga si Ma. Perla, dihang nimata siya aron mangihi, iyang nakita ang iyang bana nga nagbitay sa sagbayan sa ilang kusina ginamit ang pisi.
Dali siyang nanawag og tabang sa Emergency Medical Service (EMS) Team. Apan patay na kining naabot ang emergency team.
Sa pakisusi nga gihimo sa Pardo Police Station nga pipila ka adlaw sa wala pa mahitabo ang insidente, nagproblema sa pinansiyal ang biktima tungod sa online gambling game.
Sigon sa asawa nga alas sais sa gabii niadtong Domingo, milakaw ang iyang bana aron mangitag kautangan ug mga alas 10:30 na kining miuli nga magul-anon kay walay nautangan.
Giingong nanghuwam kini sa iyang asawa og P10 mil aron ibayad sa iyang utang. Apan nagdumili ang asawa.
Giingnan hinuon niya kini nga mangatulog na apan dihang pagka-kadlawon, naghikog na diay ang iyang bana. (/DILT)(BANAT NEWS)