Garma mobiya na, Sinas di katugot

CEBU, Philippines — Dakung kawad-on sa Philippine National Police ang pagbiya ni outgoing Cebu City Police Office director Police Colonel Royina Garma sigon ni Police Regional Office-7 Police Brigadier General Debold Sinas.

Nasayran nga si Garma moretiro na pagka polis human siya gitudlong general manager sa Philippine Charity Sweepstakes Office.

Asoy ni Sinas nga atol sa paglingkod ni Garma, nadakpan na ang mga sakop sa giilang lapad nga Ygot drug group.

Basi sa datus sa kapolisan, sukad sa paglingkod ni Garma niadtong Hulyo 1, 2018 hangtud sa Hunyo 24 karong tuiga, giingong 89.9 kilos ang ilang nasakmit nga shabu nga mobalor og P691.4 milyones.

Dugang ni Sinas nga iyang nakita nga mas disiplinado ang mga polis sa siyudad sukad milingkod si Garma.

Nasayran nga gihingusgan ni Garma ang beat patrol system sa dakbayan diin gipangdeploy sa kadalanan ang mga polis ug ang uban nagpatrol ug foot patrol roving.

Nadisiplina sab ang mga police traffic investigators sanglit kaniadto naanad na lang sila nga ang mga enforcers sa lokal nga kagamhanan maoy manguha og detalye kon adunay aksidente sa karsada.

Nunot niini, gihagit sa heneral ang mga posibling mga bag-ong city ug provincial directors.

“If Garma can do it why can’t you do it? I-maintain nimo ang discipline sa mga tao nimo,” sigon ni Sinas.

Subay niini, giingong si Mayor Edgardo Labella mi-endorso kang PCol. Gemma Vinluan hulip kang Garma. Nasayran nga ang duha ka polis, classmates ug sama og grupo.

Kagahapon gisumiter ni Sinas ang endorsement letter ni Labella ngadto kang PNP chief Oscar Albayalde, apan wala kini nagpasabot nga si Vinluan na gyud ang mopuli.

Uban kini sa endorsement letter ni Lapu-Lapu City Mayor Junard “Ahong” Chan diin iyang girekomendar si PCol. Carlito Baja nga mahimong director sa ilang siyudad.

Kahinumduman nga si Baja maoy contingent supervisor sa mga gipadalang polis gikan sa PRO-7 ngadto sa Lanao del Norte aron sa pagbantay sa seguridad sa gihimong plebisito sa Bangsamoro Organic Law.

Samtang gipaabot pa ni Sinas ang endorsement letter gikan kang Bohol Governor Arthur Yap ug ni Mandaue City Mayor Jonas Cortes.

Giingong buot ni Yap nga si PCol. Jonathan Cabal maoy mahimong provincial director sa Bohol.

Samtang si Cortes, gusto niya nga si PCol. Jonathan Abella maoy mahimong director sa Mandaue.

Hinuon, gipadayag ni Sinas nga wala siyay problema sa mga city ug provincial directors karon apan kon buot gyud sa mga mayor nga mosumiter og endorsement, dili kini nila pugngan.

Gipasabot usab niini nga bisan pa og adunay endorsement letter, kang Albayalde nga desisyon gihapon ang masunod

Kon tugotan ni Albayalde ang tanang endorsement, mag-swapping ra ang mga opisyal aron walay ma-floating          status.

Si Cabal, kinsa hepe karon sa logistics, makig-swap ra kang PCol. Julius Cesar Gornez. Samtang si PCol. Limmuel Obon, kasamtangang direktor sa LCPO, makig-swap ra unya ni Baja, kinsa maoy hepe sa Regional Public Safety Battalion.

Ug si PCol. Julian Entoma, kinsa direktor karon sa Mandaue, makig-swap ra ni PCol. Abella, kinsa maoy hepe sa Regional Personnel and Human Resources Development Division. (BANAT NEWS)