CEBU, Philippines – Gipakasal sa ilang mga pares ang 12 ka piniriso sa Talisay City Jail niadtong Lunes sa buntag.
Kini maoy usa sa mga programa nila ni Senior Insp. Crisyrel Awe, warden sa TCJ, kinsa nagkanayon nga ikaduha na nila kining gihimo nga mass wedding ubos sa iyang liderato.
Nahimo nila ang labing una nga mass wedding niadtong buwan sa Pebrero diin 23 ka paresan ang nipahimulos.
Si Msgr. Trinidad Silva maoy nikasal sa 12 ka paresan nga gilangkuban sa 10 ka lalaki nga piniriso ug duha ka babaye nga piniriso.
Matud ni Awe nga gihatag nila nga libre ang pagproseso sa dokumento ingon man ang reception alang sa mga gikasal.
Ang bugtong nagasto lang sa mga gikasal mao lang ang ilang gipangsul-ob atol sa seremonyas. (/GMR)(BANAT NEWS)