CEBU, Philippines — Gipaslak karon sa prisohan ang usa ka 49 anyos nga Norwegian national human gipasanginlang nanglugos sa iyang ka eyeball nga 15 anyos nga batang babaye diha sa usa ka resort sa Barangay Tungkop, Minglanilla niadtong Domingo sa gabii.
Sa Minglanilla, nadakpan sa kapolisan ang langyaw nga si Finn Bakkebereg, 29, temporaryong nagpuyo sa Barangay Punta Princesa, Dakbayan sa Sugbo.
Samtang ang 15 anyos nga biktima residente sa usa sa mga barangay sa Dakbayan sa Sugbo. Matud pa ni Police Staff Sergeant Jorge Tapales, desk officer sa Minglanilla Police Station nga niadtong Domingo sa alas singko sa hapon nag-abot ang duha sa usa ka resort sa Minglanilla.
Pagkagabii niana, nanawag ang biktima sa iyang amahan ug misumbong nga gihilabtan siya sa maong langyaw hinungdan nga nidangop sa kapolisan ang amahan. Miikyas unta ang suspek apan naapsan.
Sumala pang Tapales chat mates sa social media ang duha ug nagkasabot nga magkita didto apan wala magdahom ang bata nga lugoson siya niini.
Kasong child abuse ug rape ang ipasaka batok sa maong langyaw. Gisusi sab kun apilon sa kaso ang management sa maong resort. (BANAT NEWS)