CEBU, Philippines — Mahawanan na ang mga dalan nga naglibot sa gipaayo nga merkado publiko sa Dakbayan sa Lapu-Lapu nunot usab sa hinayhinay na nga pagpamalik nila sa giayo nga merkado.
Si outgoing Lapu-Lapu City Mayor Paz Radaza miingon nga ang maong mga mamaligyaay nga adunay puwesto sa gipaayo nga merkado, gihatagan na og kahigayonan sa pagbalik aron mahawanan na usab ang kadalanan sa dapit.
Kahinumduman nga gitugotan ni Radaza nga temporaryong makapahiluna ang mga manindahay sa daplin sa karsada dihang gisugdan og ayo ang naguba na nilang duha ka andana nga merkado.
Naglakip sa mga dalan nga mahawan mao ang dalan Manggubat sa Brgy. Poblacion, S. Osmeña, Lopez Jeana ug uban pa.
Matud sa outgoing mayor nga maulahi sa pagbalik kadtong mga vendor nga nag-ukopar sa ikaduhang andana sanglit aduna pay gitiwas nga trabaho ang kontraktor niini. (BANAT NEWS)