Sakop sa “rent-tangay-sangla” nangasikop

CEBU, Philippines – Duha ka mga gikatahong sakop sa “rent-tangay-sangla” carnappers, nangasikop sa gihimong entrapment operation sa may Gen. Maxilom Avenue, Dakbayan sa Sugbo niadtong Lunes sa hapon.

Ang mga nadakpan mao sila si Lara Marie Rubi Mabale, 24-anyos, taga Brgy. Capitol Site ug si Emma Carcedo Nacorda alyas Marites, 45-anyos, taga Nivel Hills, Brgy. Busay, Siyudad sa Sugbo.

Matud sa hepe sa Highway Patrol Group (HPG)-Metro Cebu nga si Police Captain Saturnino Sedigo Jr., midangop sa ilang buhatan ang usa ka negosyante nga nagpaabang og sakyanan.

Giingong niadtong Hunyo 7 pa giabangan ni Nacorda ang Toyota Vios ug wala na giuli sa gikasabutan nila nga adlaw niadtong Hunyo 9.

Wala masayod si Nacorda nga adunay GPS o Global Positioning System ang maong sakyanan maong na-trace kini.

Napalgan ang sakyanan sa Brgy. Talamban ug nasuta nga giprenda kini sa mga dinakpan.

Gihimuan diay kini og peke nga official receipt ug certificate of registration ubos sa pangalan ni Mabale.

Kay giingong nagpadugang silang Mabale og kwarta sa pagprenda sa maong sakyanan, dinhi na nahimo ang operasyon batok sa duha diin nakig-alayon sila sa giprendahan niini sa Talamban.

“Giprenda niya og P150k unya nagpadugang pa siya og P100k aron P250k tanan, mao to nga nag-meet up,” matud ni Sedigo.

Butyag sa maong hepe nga nadiskubrehan sab nila nga adunay mga pekeng dokumento si Nacorda diin Marites ang iyang gigamit nga pangalan.

Gawas sa mireklamo, aduna na karoy midangop sa ilang buhatan kinsa nagpaila nga nabiktima sab sa maong mga suspek.

Kalapasan sa Anti-Carnapping Law ug Falsification of Public Document ang atubangon sa duha.

Sa laing bahin, kaduha nadakpan ang 20-anyos nga si Romeo Niño Consad nga taga Sitio Villagonzalo, Brgy. Tejero, Dakbayan sa Sugbo.

Kay samtang gipriso kini sa detention cell sa San Francisco Police Station sa Isla sa Camotes human masikop sa buy-bust operation nga gipahigayon sa Sitio Campacong, Brgy. San Isidro sa naasoy nga lungsod niadtong Septiyembre 15, 2018, gisilbihan kini og warrant of arrest sa mga sakop sa HPG niadtong Lunes sa hapon.

Matud ni Police Major Pedey Noval sa San Francisco Police Station nga si Consad, wanted gumikan sa kasong carnapping.

Nasayran nga ang warrant batok kang Consad, giisyu ni RTC-7 Judge Gilbert Moises niadtong Mayo 2, 2019. (Rose Carmel De la Cerna/DILT)(BANAT NEWS)