CEBU, Philippines — Kanhi napriso sa Cebu City Jail gumikan sa kasong pagpanulis, nakit-an nga wala nay kinabuhi sa may Sitio Latawan, Brgy. Sinsin, bukirang bahin sa Dakbayan sa Sugbo niadtong Domingo sa hapon.
Ang nakalas giila sa mga awtoridad nga si Alexander Lumapak, 24-anyos, taga Kinabranan Zone II (Poblacion), Lungsod sa Allen, Northern Samar basi sa iyang identification card nga anaa sa sulod sa iyang backpack.
Ang biktima nakaangkon og mga samad pinusilan sa nagkadaiyang parte sa iyang lawas. Gibaatan ang iyang mga kamot og packaging tape, gitabonan ang ulo niini og t-shrit nga gibaatan sab og packaging tape.
Ang patayng lawas niini gipaskinan og karton nga adunay nakasulat “Ex-convict ako, motornapper, pusher, usher, wag tularan, may susunod pa”
Sa inisyal nga imbestigasyon sa Pardo Police Station, matud sa saksi nga ang biktima gikarga sa itom nga pick-up truck nga walay plate number. Nakadungog usab kini og buto-buto sa armas.
Pipila ka gutlo human sa mga buto, ang sakyanan daling mibiya sa dapit ug mipasutoy paingon sa Campo 7 habig sa Dakbayan sa Talisay.
Laing nakit-an sa crime scene mao ang lima ka basiyo sa bala sa wala matinong kalibre sa armas.
Padayon pang nanguha og dugang impormasyon ang kapolisan, lakip na ang pagsusi sa motibo sa pagpatay niini. - Rose Carmel De la Cerna (BANAT NEWS)