Gitigbas sa gikasumpaki

CEBU, Philippines — Gitigbas ang usa ka lalaki sa iyang gikasumpaki sa may Brgy. Baklayan sa Lungsod sa Boljoon niadtong Sabado sa hapon.

Ang biktima mao si Felix Antonio Aragon, 34-anyos samtang ang suspek mao si Ronie Miras, 23-anyos.

Matud ni Police Senior Master Sergeant Fernando Toledo, gitigbas sa likod gamit ang sanggot ang biktima dihang nakit-an kini sa suspek duol sa tunghaan.

Si Kapitan Elderson Mabalatan maoy nakakita sa hitabo hinungdan nga dali kining nanawag sa kapolisan sa Boljoon samtang daling gidala sa Oslob District Hospital si Aragon.

Sa dugang pakisusi sa kapolisan, nasuta ni Police Staff Sergeant Hitler Andalajao adunay pagdumot sa usa’g usa ang duha.

Nagtingkagol na sa prisohan si Miras ug mag-atubang og reklamong Frustrated Homicide. (BANATNEWS)