CEBU, Philippines — Nunot sa bangi sa mga opisyal, giawhag ni acting Barangay Captain Anne Marie Vestil Palomo mohangyo sa konseho sa Siyudad sa Sugbo sa pagdeklarar sa Mambaling ubos sa state of calamity.
Kini aron magamit sa barangay ang ilang disaster fund human naigo sa dakung sunog sa niaging adlaw ang Sitio Huyong-Huyong ug Puntod sa Alaska, Mambaling.
Apan hangtud karon wala pa makadeklarar og state of calamity ang mga opisyal sa barangay tungod kay wala ang ubang konsehal.
Si Palomo nipasangil nga ang upat ka konsehal nga alyado sa suspendidong kapitan nga si Gines Abellana dili manambong sa sesyon sukad niadtong Enero.
“I cannot get a quorum. Since January 11 session that I presided ni-absent ang four councilors. Adto sila ni-attend sa suspended barangay captain nga si Abellana, grabe ka paugat,” matud ni Palomo. Ang maong mga konsehal mao sila si Wilfredo Go, Owen Atillo, Roseller Salvador ug Sangguniang Kabataan chairwoman Sharmaine Maloloy-on.
Ang tulo nga alyado ni Palomo mao sila si Konsehal Edwil Managbanag, Victoriano Laborte ug Neonita Cuestas.
Ang panagbangi nagsugod sa paglingkod ni Palomo isip acting barangay captain human si Abellana gisuspenso sa konseho sa siyudad sa giingong wala paghatag sa honoraria sa upat ka konsehal niadtong Enero 8.
Sila si Palomo, Managbanag, Laborte ug Cuestas ang nisang-at sa kasong administratiba batok ni Abellana human sila wala hatagi sa honoraria gikan sa Hulyo hangtud Disyembre sa niaging tuig.
Nunot niini giawhag ni Palomo ang konseho sa siyudad nga maoy modeklarar og state of calamity aron magamit ang P527,000 nga disaster funds alang sa mga nasunogan.
Awhag sab ni Palomo sa kagamhanan sa siyudad ang dinaliang pagpagawas sa hinabang nga tag P20,000 matag pamilya ug mga housing materials.
Kasamtangang gipahimutang sa Puntod gymnasium ang mokabat sa 150 ka pamilya kansang 81 ka balay ang naugdaw. (BANAT NEWS)