Edukasyon, panglawas prayoridad ni Radaza

CEBU, Philippines — Sa tumong nga mapaduol gihapon sa mga Oponganon, si outgoing Lapu-Lapu City Mayor Paz  Radaza, sa City Hall gihapon mag-opisina bisan og hulipan na siya ni Mayor-elect Junard Ahong Chan.

Matud pa niya nga sa iyang pag-asumir sa katungdanan isip kongresista sa Lone Congressional District sa dakbayan, anha lang gihapon siya mopahimutang sa iyang bag-ong opisina.

Gitataw ni Radaza nga sukad pa niadtong panahon sa iyang bana nga si kanhi kongresista Arturo “Boy” Radaza ug gisundan sa ilang anak nga si Aileen, diha na magpahimutang sa usa sa mga lawak sa City Hall aron maoy magsilbing buhatan sa kongresista nga nahimutang tapad usab sa buhatan sa mayor.

Gipasabot ni Incoming Congresswoman Radaza nga kini ilang gituyo aron dali usab nga makaduol ang katawhan  sa kabarangayan sa mainland  ug Isla sa Olango  nga ilang gialagaran sulod na sa daghang katuigan.

Dugang pa niya nga ang buhatan sa kongresista walay kalainan sa uban nga ahensiya sa nasudnong kagamhanan nga anaa usab sa City Hall compound aron dili maglisod ang mga Oponganon sa pagduol alang sa ilang mga panginahanglan.

Si Radaza miingon nga tipik ug kabahin sa daghan niyang pagahimuon unya sa bag-ong mandato nga gihatag kaniya sa katawhan mao ang pagpadayon sa pagpalambo sa kahimtang sa edukasyon pinaagi sa pagpatukod og dugang edipisyo alang sa mga lawak saringan, pagtagad sa kahimtang sa panglawas, Senior Citizens,  People with Disablity ug daghan pa. (BANAT NEWS)