50 ka kahoy i-ball out sa Kawit Island
CEBU, Philippines — Ang P18 billion integrated resort ug casino nga mahimutang sa siyam ka ektaryang Kawit Island, kinahanglan nga adunay i-earthball nga 50 ka kahoy matud pa sa Department of Environment and Natural Resources-7.
Una niini, ang Universal Hotels and Resorts Inc. (UHRI) nangayo og pagtugot sa Cebu City Environment and Natural Resources Office (CCENRO) alang sa earth balling sa 15 ka kahoy aron paghatag og dalan sa development sa 9-hectare nga Kawit Island. Apan si DENR-7 Community Environment and Natural Resources Officer Raul Pasoc mitala og 50 ka kahoy nga apektado sa earthballing atol sa actual inspection.
Sa April 15 nga suwat, si Pasoc miingon nga adunay mga gikinahanglan nga mga rekisitos nga i-comply sa dili pa ang pag-isyu og permit sama sa letter request gikan sa proponent, resolution gikan sa konseho nga naglatid nga walay pagsupak sa pagkuha sa mga kahoy, project plan nga magpakita sa structure nga tukuron ug lokasyon sa mga kahoy nga maapektuhan, Environmental Compliance Certificate, earth balling ug transplanting plan nga adunay mga mapa.
Ang pangulo sa CCENRO nga si Nida Cabrera miingon nga ang iyang buhatan naka-isyu na og ‘no objection document’ ug susihon kini sa konseho nga mo-isyu usab og resolusyon alang sa ‘no objection’ sa earthballing sa mga kahoy.
Matud ni Cabrera, ang iyang buhatan motabang sa UHRI sa pag-ball-out sa mga kahoy sanglit aduna silay mga eksperto nga makasiguro nga ang maong mga kahoy mabuhi gihapon.
Dugang niya, ang maong earth balling dili makaapekto sa kalikupan sanglit walay mga kahoy nga putlon.
Ang mga na-earth ball nga mga kahoy giingong ibalhin sulod ra sab sa project site, apan si City Administrator Nigel Paul Villarete sa iyang suwat kang Cabrera miingon nga ang UHRI mo-transplant sa balled-out trees ngadto sa pribadong propeyidad sa Dakbayan sa Lapu-Lapu. (BANAT NEWS)
- Latest
