Binaliw landfill gireklamong baho

CEBU, Philippines —  Usa ka signature campaign ang gilusad karon batok sa operasyon sa usa ka sanitary landfill sa Barangay Binaliw sa dakbayan sa Sugbu tungod sa reklamo sa mga residente sa maong dapit ug sa mga kasikbit nga barangay.

Si Apas councilman Ramil Ayuman kinsa usa sa mga nagpasiugda sa maong kampanya miingon nga daghan ang nangreklamo sa maong dapit tungod sa nangalisbong baho sa basura gikan sa landfill.

Gitug-an niya nga ilaha kining nadunggan gikan mismo sa mga residente sa maong dapit nga nangreklamo batok sa pribadong landfill sa maong barangay.

Gipaabot nila nga moabot 70% sa mga residente sa maong barangay ang mopirma sa petisyon apil na usab ang nagpuyo sa mga subdivisions nga maagian sa mga trak sa basura ug sa mga environmental groups.

Gibutyag usab ni Ayuman nga dili lang basura gikan sa Cebu City ang gitambak didto tungod kay hasta mga garbage trucks gikan sa Dakbayan sa Mandaue naglabay sab didto og basura.

Ang maong 10-ektaryang landfill gi-develop human giaprubahan sa konseho sa dakbayan ang pagporma niini. Ang konseho gidominar sa Bando Osmeña Pundok Kauswagan dihang ilang giaprubahan ang special land use permit sa ARN Builders Inc., developer.

Ang maong kompanya gihatagan og accreditation papers gikan sa Cebu City Environment and Natural Resources Office (CCENRO).

Si mayor- elect Edgardo Labella mibutyag nga kaniadto pa siya supak sa operasyon sa Binaliw landfill tungod kay makaguba kini sa kinaiyahan ug peligro ang panglawas sa mga residente didto. Matud niya nakadawat sab siya og daghang reklamo batok niini.  “Actually, I really share the sentiments of those residents who are against it because it is always my position that there should not be any landfill anymore in the City of Cebu. Besides the Binaliw landfill is a place that is densely populated. There are many residents surrounding the area and there are subdivisions,” matud pang Labella. Gikan sa The Freeman, IBM (BANATNEWS)