CEBU, Philippines – Miangkon si Bise Gobernador Agnes Magpale nga nakugang siya sa resulta sa milabay nga eleksiyon hilabina sa Kinto Distrito nga maoy ilang balwarte.
Si Magpale napildi ni Tersero Distrito Kongresista Gwendolyn Garcia pagka-gobernador sa Lalawigan sa Sugbo niadtong Lunes.
Basi sa partial ug unofficial result, si Garcia nakakuha og 844, 291 samtang si Magpale nakakuha og 569, 071 ka botos gikan sa 51 ka lungsod ug dakbayan sa tibuok lalawigan.
Sa Fifth District o Kinto Distrito, si Garcia nakakuha og 128, 228 samtang si Magpale nakakuha lang og 106, 417 ka botos.
Ang naasoy nga distrito gilangkuban sa Borbon, Catmon, Compostela, Liloan, Pilar, Poro, San Francisco, Sogod, Tudela ug Dakbayan sa Danao.
Apan sa maong napulo ka mga lugar, sa Danao ug Sogod ra si Magpale nakadaug.
Matud sa gobernador nga basi sa ilang pagkwenta ug sa survey, 70 mil ngadto sa 80 mil ang makuha niya nga mga botos sa iyang balwarte nga distrito.
“Of course I was also shocked because the surveys in the last 3 days, I was head by 15% sa survey, unya consistent ang surveys”, asoy ni Magpale.
Wala mahibalo si Magpale kon unsay rason nga daku ang labaw ni Garcia kaniya hilabina sa ilang distrito. Dili usab siya motuo nga adunay epekto ang endorsement ni President Rodrigo Duterte.
“I don’t know, we don’t want to make any conclusion, we are trying to analyze but we cannot do anything at the moment”, sumala sa bise gobernador.
Human sa iyang termino pagka bise gobernador karong Hunyo 30, plano ni Magpale nga mobalik sa Danao ug atimanon ang iyang umahan ug ingon ang ilang gipanag-iya nga eskwelahan, ang North Eastern Cebu College nga adunay bag-ong itukod nga building alang sa expansion aron sa pag-accomodate sa K-12 program. Dugang niya nga aduna na usab siyay oras alang sa iyang pamilya hilabina sa iyang apo.
Iyang giklaro nga naka-move-on na siya sa eleksiyon hilabina nga dugay na siyang gusto nga moretiro sa politika. (/DILT)(BANAT NEWS)