Budget pagpalit og boto ang tuyo

CEBU, Philippines – Nagtuo ang direktor sa Police Regional Office-7 nga si Brigadier General Debold Sinas nga kwartang  pangpalit og botos ang tumong sa mga armadong lalaki nga miransak sa barangay hall sa Apas, ning Dakbayan sa Sugbo atol sa adlaw sa piniliay.

Tug-an sa heneral nga base sa ilang intelligence monitoring nga adunay kwarta sulod sa maong barangay hall nga posibleng gamiton pamalit og boto apan wala nakagawas maong gisulong sa mga armado.

Apan wala sa iyang opisina si Apas Barangay Captain Virgilio Cabigon ug wala nila makit-i ang butang nga ilang gipangita, gikuha na lang sa mga armadong lalaki ang tulo ka mga barangay workers.

Matud pa nga gipangita sa grupo si Cabigon ug giukay ang iyang mga gamit ug sa dihang wala nakit-i ang ilang gipangita, gipanguha ang tulo ka mga cellphone sa mga barangay worker:  Freddie James Velasco, ulo sa Barangay Risk Reduction Management Office; Jhon Villa 30; ug Christopher Calumba 40.

“It’s already confirmed nga kadtong mga armado nga nisulod, ang gipangita gyud kay ang barangay captain, naay intel reports but not yet confirmed nga naay kwarta didto intended, let’s say vote buying nga wala makagawas,” sigun  ni Sinas.

Dugang niini nga ang barangay hall sa Apas gyud ang tumong niini sanglit sa kadaghang barangay kadto gyud ang gituyoan og adto sa mga armado bisan og duol ra kaayo ang Central Command sa Armed Forces of the Philippines.

Si Cabigon kaalyado sa kang Cebu City Mayor Tomas Osmeña nga Bando Osmeña Pundok Kauswagan (BOPK).

“Kung kanus-a pa natapos ang eleksyon when everybody is already preparing for the final tapos out of the blue gisulod to sa Apas,” dugang sa heneral.

Dakong hagit karon sa kapolisan ang pagsulbad sa maong kaso sanglit walay CCTV sulod sa maong barangay hall.

Gisubay pa sa kapolisan ang ubang mga establisamento duol sa barangay hall sa pamasin nga dunay CCTVs nga nakakuha sa hulagway sa mga armado nga giingong nagsakay og puti nga van. (/IBM)(BANAT NEWS)