El Niño nagpadayon ang epekto niini

CEBU, Philippines – Nagpadayon ang apektado sa El Niño sa Probinsiya sa Sugbo diin nikabat na ngadto sa milyones ang kadaut sa agrikultura, kahayopan ug panagat.

Si Rhee Telen, Jr. sa Provincial Disaster Risk Reduction Management Office nibutyag nga nikabat na ngadto sa P110.9 milyones ang danyos sa huwaw base sa report sa mga lokal nga kagamhanan.

Ang ulahing nadugang mao ang report sa Dakbayan sa Toledo, Lungsod sa San Francisco ug Poro sa Isla sa Camotes.

Base sa datos sa PDRRMO, nikabat ngadto sa P3 milyones ang danyos sa huwaw sa Dakbayan saToledo sa ilang mga high valued crops, humay ug mais.

Samtang sa San Francisco naabot ngadto sa P2.7 milyones ang danyos sa mga agrikultura niini ug ang Poro nikabat ngadto sa P317,500 ang danyos sa livestock ug pananom niini. Base usab sa talaan sa PDRRMO liboan ka pamilya ang apektado sa huwaw ug nagkagamay ang suplay sa tubig.

Nikabat ngadto sa 13,128 ka pamilya o 67,057 ka indibidwal nga apektado sa El Niño.

Base sa Mayo 10 nga datos, adunay 14 ka munisipyo ug siyudad  sa probinsiya nga nideklarar og state of calamity human sa provincial level nga deklarasyon.

Niadtong Marso 25, ang tibuok probinsiya gipaubos kini sa state of calamity.

Ang maong mga lugar nga nideklara og state of calamity gilangkuban sa mga Lungsod sa Ginatilan, Minglanilla, Samboan, Sogod, Tudela, Dumanjug, Alcoy, Santander, Carmen, Compostela, ug Asturias ug mga siyudad sa Carcar, Toledo, ug Talisay. (/BDB)(BANAT NEWS)