CEBU, Philippines – Patay ang 43 anyos nga babaye human siya gikulata sa iyang kapuyo atubangan sa ilang mga anak diha sa ilang balay sa Sitio Good Shepherd, Barangay Guadalupe ning Dakbayan sa Sugbo.
Ang biktima giila nga si Maria Theresa Umagat samtang ang suspek mao si Raul Micolob Quecho, 45, nagpuyo sa maong lugar.
Sigun pa sa imbestigador sa maong kaso nga si Police Master Sergeant Ronnie Nudalo nga mismong ang 15 anyos nga anak nga lalaki sa duha maoy nakasaksi sa pagpangulata niadto pang Biyernes sa gabii.
Giingong dili lang mga kumo ug sagpa ang nadawat ni Umagat kay gisabyagan usab kini og ininit nga tubig sa nawong sa iyang banabana.
Tibuok adlaw nga Sabado, wala mobangon gikan sa pagkatulog si Umagat ug nianang pagka adlaw nga Domingo gisuwayan kini sa 15 anyos pagpukaw apan wala na gyud kini mimata hinungdan nga gisumbong nila sa kapolisan ang nahitabo.
Nadakpan na kagahapon sa hapon ang suspek, atol sa hot pursuit operation sa kapolisan.
Ang hepe sa maong estasyonan nga si Police Captain Dexter Basirgo nagkanayon nga wala motug-an ang suspek kun unsay hinungdan sa away nilang managkapuyo.Kasong murder ang gipasaka sa kapolisan batok kang Quecho kinsa anaa na natanggong karon sa Guadalupe Police Station. (/IBM)(BANAT NEWS)