Pagbukas sa NYD 2019 malinawon

CEBU, Philippines – Gipahigayon sa Cebu City Sports Complex (CCSC) niadtong Miyerkules ang opening program agi og pag-welcome sa mga pilgrims sa National Youth Day 2019 nga gikan sa nagkadaiyang lugar sa Pilipinas.

Human sa maong kalihukan sa CCSC, gisunod dayon ang prosesyon uban ang upat ka mga karosa nga gikargahan sa mga imahe nila ni San Pedro Calungsod, ang Sugbuanong patron sa mga batan-on, San Jose, Birhen sa Guadalupe ug Snr. Sto. Nino paingon sa Basilica Minore del Santo Niño de Cebu.

Gisaulog usab dayon ang opening mass nga gipangulohan ni Cebu Archbishop Jose Palma kinsa mipahinumdum atol sa iyang wali nga ang tanan nagsubay og usa ka panaw ug anaa na sa tawo ang pagsubay sa tukma nga dalan bisan ug adunay daghang mga hagit nga masugatan.

Sumala sa arsobispo nga ang gihimo nga prosesyon, nagpahinumdum kini sa tanang katawhan nga niining panaw sa kinabuhi, walay mag-inusara kay ang Ginoo nakig-uban sa tanan.

Dugang niya nga ang pagkabanhaw ni Kristo nagpahinumdum usab nga buhi ang Ginoo kinsa nag-antos ug nagpakamatay tungod sa iyang gugma sa katawhan.

Gitapos ang misa og traditional Sinulog dance aron masinati sa mga pilgrims ang maong matang sa pagdebosyon sa Balaang Bata. Sa habig sa seguridad, gipahibawo ni Police Regional Office-7 director Debold Sinas nga miabot sa 40 mil ang misalmot sa kalihukan nga gilangkuban sa mga pilgrims, mga deboto ug ang nagpatuman sa kahapsay ug kalinaw.

Giingong aduna silay natala nga pagpangawat nga nahitabo sa Lungsod sa Minglanilla diin gipasanginlan ang caretaker sa gipuy-an sa mga pilgrim nga maoy nangawat og mga butang. Apan gawas niini, giingong malinawon ug malampuson ang unang kalihukan sa lima ka adlaw nga NYD.

Nunot niini, gipangandaman karon sa Cebu City Transportation Office (CCTO) ang laing kalihukan subay sa NYD ug mao kini ang Pilgrim Walk nga mahitabo ugmang adlawa, Abril 27.

Matud ni CCTO operations chief Francisco Ouano nga aduna gihapoy road closure nga mahitabo nga magsugod sa Capitol Site paingon sa CCSC gikan sa alas 2 sa hapon hangtod mahuman ang kalihukan.

Panawagan niya sa publiko nga kon walay tuyo sa maong dapit ilabi na sa Osmeña Blvd., dili nalang moadto ug kadtong mga magdala og sakyanan, siguraduhon nga i-park kini og sakto aron dili makabalda sa kadalanan. Kay kon ilang masakpan, siguradong ila kining i-clamp.

Nasayran sab nga moabot sa 150 ka traffic enforcers ang ipakatap ugma aron mobantay sa matag intersection ug sa mga dapit nga maapektuhan sa road closure. (Camille L. Pateres ug Decemay P. Padilla/DILT)(BANAT NEWS)