Bag-ong kagamitan paliton unya sa CDRRMO

CEBU, Philippines – Awtorisado na ang Cebu City Disaster Risk Reduction Management Office (CCDRRMO) sa paggamit sa P57.2 million alang sa pagpalit sa nagkalain-laing emergency tools ug medical accessories.

Giaprubahan sa konseho sa Siyudad sa Sugbo ang resolusyon nga nagtinguha sa approval sa pag-charge sa pundo sa capital outlay (disaster response and rescue equipment) account nga gi-sponsor ni Konsehal Dave Tumulak. Sigon niini, ang tumong sa procurement sa emergency tools ug uban pa mao ang pagpalambo sa emergency services ug public assistance sa panahon ug human sa bisan unsang klase sa katalagman.

Sa wala pa nakadesisyon si Tumulak nga mo-sponsor og resolusyon, ang planning head sa CCDRRMO mihangyo kaniya labot niini pinaagi sa CCDRRMO resolution.

Nakalatid sa maong resolusyon nga ang pagpalit og emergency tools ug medical accessories subay na sa joint memorandum circular no. 2013-1 sa National Disaster Risk Reduction Management Council, Department of Budget and Management ug Department of Interior and Local Government nga ang allocation sa disaster funds gitagana alang sa prevention, mitigation, preparedness, response, rehabilitation, recovery ug mahimong gamiton sa pag-procure og early warning systems ug preparedness equipment.

Ang mga paliton unya naglangkub sa mga bag-ong sakyanan pang-rescue ug ambulansiya ug nagkadaiyang kagamitan.

Diin ang ubang gamit sama sa mga hoses ihatag sa mga kabarangayan alang sa ilang community-based disaster team. Sigon sa konsehal nga ang pagpalit sa maong mga gamit, dili covered sa election ban sanglit paliton kini human sa eleksiyon. (/DILT)(BANAT NEWS)