Pabantayan aron di mailad sa ka-chat, ka-text
CEBU, Philippines — Mipahimangno si Bise Gobernador Agnes Magpale ngadto sa mga ginikanan nga bantayan ang ilang mga anak hilabina ang mga babaye nga i-monitor pag-ayo ang mga ka-chat o ka-text niini.
Karong panahon sa ting-bakasyon, dili malikayan nga adunay mga laag ang mga kabatan-onan ug posibleng anha mahitabo ang pakigtagbo sa mga ka chatmate o textmates nila.
Si Magpale kinsa maoy co-chairperson sa Provincial Council for the Welfare of Children (PCWC) miawhag usab sa mga ginikanan nga mosumbong sa awtoridad kon makabantay nga delikado na ang kinabuhi sa ilang mga anak.
Kini sama sa nahitabo sa usa ka inahan sa Dakbayan sa Mandaue nga misumbong sa buhatan sa bise gobernador nga ang iyang 16-anyos nga anak, gisuwayan og bugaw sa usa ka tawo.
Mihimo dayon og operasyon ang PCWC uban sa mga sakop sa National Bureau of Investigation (NBI) ug naluwas ang dalagita didto sa Zamboanga City.
Matud ni Magpale nga usa kini ka maayo nga ehemplo sa inahan nga dali dayon nagpakitabang aron paglikay nga mabiktima ang anak.
Si Magpale midugang nga nakasabot siya nga adunay trabaho ang mga ginikanan apan kinahanglan nga angay i-prayoridad ang pamilya hilabina ang mga anak. (/DILT)(BANATNEWS)
- Latest