CEBU, Philippines — Usa ka 14 anyos nga batang babaye gilugos sa 15 anyos niya nga barkada ibabaw sa nitso diha sa Good Shepherd Celestial Garden sa Dakbayan sa Sugbo kagahapon sa kaadlawon.
Gitago sa kapolisan ang pangalan sa biktima aron sa pagprotekta niini samtang wala sab gibutyag ang pangalan sa suspek sangit menor de edad pa kini.
Ang hepe sa Guadalupe Police Station nga si Police Major Dexter Basirgo mibutyag sa Banat News nga mireklamo uban sa iyang ginikanan ang 14 anyos nga biktima nga giingong gilugos sa iyang kainom.
Sa inisyal nga imbestigasyon, nakig-inom ang biktima uban sa mga higalang lalaki sa maong dapit ug sa dihang nangahubog na giingong kalit lang siya nga giguyod sa 15 anyos ibabaw sa nitso ug gilugos.
“Dili man hinuon gang rape, usa ra gyuy nag rape niya. Wala kuno madunggi sa mga kainom,” sigun pa ni Basirgo.
Dugang sa hepe, aduna pay usa ka babaye nga kauban ang maong managhigala kinsang giingong gilugos sab sa lain nilang kainom apan wala kini misumbong sa kapolisan.
Gipangita na karon ang gitumbok nga suspetsado, kinsang taga Guadalupe ra ingon man ang tanang mga kainom sa biktima aron makuhaan og pamahayag.
Sigun ni Basirgo nga kada gabii na gyud nga adunay magtapok nga mga batan-on sa maong lugar sanglit mingaw na ang maong dapit matag gabii. (/IBM)(BANATNEWS)