CEBU, Philippines — Miabot sa kapin us aka gatos ka mga batan-on gikan sa 27 ka barangay sa Dakbayan sa Mandaue ang gihatagan og kahigayonan nga mokita og salapi niining panahon sa ting-init pinaagi sa gipasiugdahan nga Summer Job sa kagamhanan ubos sa Government Internship Program.
Hingpit na nga gibuksan ang maong programa pinaagi sa pagpaubos sa maong mga batan-on sa orientation nga gipahigayon kagahapon. Sila nagpanuigon og 18 ngadto sa 30-anyos.
Subay sa maong orientation, gihatagan sila og Daily Time Record (DTR) sheet nga maoy magsilbi nilang kamatuoran sa ilang pagtrabaho nga mao say basihan sa ilang pagdawar ug suweldo.
Ang maong mga batan-on nga nakaapil, gipangdestino sa lain-laing departamento sa kagamhanan nga molungtad og napulo ka adlaw nga pagtrabaho sa P300 nga suweldo matag adlaw.
Si Clark Dale Morpos nga maoy Local Youth Development Officer sa iyang pamahayag miingon nga sa kapin 100, kasagaran kanila mga out-of-school youth diin daku kaayog tabang ngadto kanila ang maong programa. DILT (BANATNEWS)