CEBU, Philippines – Usa ka motorista patay samtang naangol ang sakay niini human nagkabangga sa kasugat nga van diha sa Barangay Sangat, Lungsod sa San Fernando niadtong Sabado sa gabii.
Ang nakalas giila sa kapolisan nga si Javier Matmat Conde, 29, taga Barangay Basak sa maong lungsod. Samtang naangol ang sakay niini nga si Rommel Lines,33.
Si Police Officer 1 Ian Lagnason, usa sa mga traffic investigator sa San Fernando Police Station, mibutyag nga sakay ang duha sa usa ka motorsiklo paingon sa habagatan.
Giingong misuway sila og overtake sa gisundang sakyanan apan nakasugat nila ang usa ka Nissan van nga paingon sa amihanan nga gimaneho sa usa ka Stephen Cue, 33, taga San Fernando. Matud ni Lagnason nga gidala sa Carcar District Hospital silang Conde ug Lines apan gideklarang dead on arrival si Conde tungod kay ang ulo maoy nagrabehan kay wala magsuot og helmet.
Sigun ni Lagnason nga dili desididong mopasaka og kaso ang kabanay sa namatay apan magpatabang lang sila niini sa danyos nga nahimo. (/IBM)(BANAT NEWS)