CEBU, Philippines — Duha ka mga Koreano ang nasikop sa mga sakop sa National Bureau of Investigation Central Visayas sa may Barangay Kasambagan, Dakbayan sa Sugbo tungod sa online illegal gambling.
Bitbit ang search warrant, gisikop silang Jang Yihyuk, 35, ug Do Jongwon, 27, nga giingong nagpadagan sa maong online illegal gambling samtang nag-abang ug unit sa usa ka condominium diha sa lugar.
Matud pa ni NBI-7 Regional Director Atty. Tomas Enrile, nakadawat sila og reklamo gikan sa Philippine Amusement and Gaming Corporation nga ang maong mga dinakpan nalambigit sa online illegal gambling.
Sumala pa ni Enrile, dako ang ilang pagtuo nga taud-taod nang nag-operate og illegal gambling ug ang mga mamusta ilaha ra sab mga kababayan sa South Korea.
Nasakmit sa NBI ang mga kagamitan sa pagpadagan sa online games sama sa mga computers ug uban pa.
Ang mga dinakpan wala mohatag og pamahayag sa media ug natanggong karon sa karsel sa NBI-7. (/IBM)(BANATNEWS)