Tubig sa mga swimming pool magamit sa sunog, El Niño

CEBU, Philippines – Nanawagan si Konsehal Dave Tumulak, Chairman sa Committee on Public Order and Safety, sa mga hotels, resorts, sports recreational activities ug residential areas nga adunay swimming pool nga makig-alayon sa iyang buhatan kun pananglitan mag-ilis sila og tubig sa pool aron mapadad-an og tanker pagsuyop sa tubig.

Kini aron magamit pa ang tubig sa mga sunog o ibubu sa mga tanom sa kadalanan sa syudad sa Sugbo.

Si Konsehal Tumulak, miingon nabantayan nila nga dunay mga swimming pool operators nga ang tubig iyabo lang sa drainage system ug usik kini alang kaniya.

Maoy hinungdan nga hipuson kini sa siyudad aron magamit isip pagpangandam sa El Niño aron dili kaayo maka-consume og tubig ilabi na ang mga water distributor sa siyudad.

“Daghan man kaayo gud, mao na this is part of their social responsibility kay karon nga nasinati nato ang El Niño kinahanglan naa say cooperation sa mga swimming pool operators, ma-residential ka man, ma-condominium, ma-hotel, sports recreational facilities nga dili masayang ang tubig kay pila na ka thousands of galloons of water naa diha sa swimming pool”, matod ni Tumulak. Kahinumduman ang Metro Cebu nakasinati og grabeng kainit sa panahon diin daghang lugar ang apektado sama sa pagpangliki sa yuta ug pag-menus sa supply sa tubig. (BANAT NEWS)