P2M ganti ang ihatag

CEBU, Philippines – Mokabat na sa P2 milyones ang kantidad  sa gitanyag nga ganti alang ni bisan kinsa nga makahatag og impormasyon aron madakpan ang mga mamumuno sa pagpatay sa 16  anyos nga tinun-an sa Grade 9 ug kolektor sa simbahan nga si Christine Lee Silawan sa Sitio Dapdap, Barangay Bankal, Dakbayan sa Lapu-Lapu.

Si  Presidential Assistant to the Visayas Michael Dino miduaw sa haya sa biktima sa ilang panimalay sa Sitio Lasang, Barangay Mactan sa maong dakbayan ug mipahibalo nga mohatag kini og P100 mil nga  ganti alang  sa pagkasikop sa mamumuno ni Silawan. Personal niya kining salapi.

Gitug-an sab ni Dino nga si PhilPost Chairman Norman Fulgencio mipadayag   nga modugang usab kini og laing  P100 mil gikan sab sa kaugalingong bulsa.

Ang Police Regional Advisory  Council (PRAC) 7  una nang nagpahibalo nga motanyag og P100 mil ug ang kagamhanan sa Dakbayan sa Lapu-Lapu pinaagi ni Mayor Paz  Radaza nagpahibalo nga mohatag og P1 milyon nga ganti.

Laing dugang nga P500 mil ang gitanyag sa usa ka retiradong sundalo  nga American national nga nagbase sa Leyte.

Ang Cebu Provincial Council   for the Welfare of Children mohatag sab og P200 mil aron pagdasig ni bisan kinsa nga motabang aron madakpan ang mga mamumuno.

Gawas kang Dino, gitunol sab niya ang  P20 mil nga  cash assistance si Presidente Rodrigo Duterte ug mipasalig nga tabangan ang pamilya kutob sa mahimo sa gobiyerno aron mahatagan og hustisya si Christine.

Matud pa ni Dino wala sa maayong panghuna-huna ang tawong naghimo niini.

Giawhag usab ni Dino ang katawhan nga magmatngon kanunay ilabi na kadtong mga kababayen-an nga dili na maglakaw-lakaw panahon sa kagabhion, ug giawhag ang mga tawong may kasayuran sa krimen nga tabangan ang otoridad.

Samtang si Archbishop Jose Palma, nitug-an sa Banat News nangaylap sila og hinabang nga matunol alang sa pamilyang Silawan.

Kaila ra?

Si Police Senior Supt. Limuel Obon, Lapu-Lapu City Police Office Director nitug-an padayon ang ilang manhunt operation sa primary suspect nga ilang gitumbok karon nga adunay warrant of arrest sa kasong murder.

“Wala kaming order na shoot to kill. We wanted him to be arrested alive, ang ako gani giingon sa akong mga tawo if he will fire upon, you cover and if you have to return fire, dito lang sa mga extremities.

We want him to face the public unless talagang ang aking pulis ay na corner na like he has to retaliate, that’s the only time that he will use lethal force. Pero instruction is to catch him alive,” nagkanayon si  Obon.

Dako ang ilang pagtuo nga kaila ra sa biktima ang mamumuno sanglit aduna silay nakuhang kopya sa footage sa Closed Circuit Television nga mikuyog ra ang biktima sa maong tawo.

“Di man ta ganahan og scapegoats gud. We want the real perpetrators, the real murderers dili kay dali lagi pero sayop pud,” pasidaan ni Dino pa sa iyang pamahayag.

Nikondenar

Si Bise Gobernador Agnes Magpale nihulagway nga dili normal ang tawo nga nihimo sa maong linoog nga pagpatay.

“We were so upset with the way Silawan was murdered and we would like to condemn in the strongest of terms what they did to the girl, babaye and minor, and very ironic it happened on March 14 nga sulod pa gyud sa women’s month” matod ni Magpale.

Si Magpale ni-sponsor og duha ka resolusyon alang sa paghatag sa Kapitolyo og ganti nga P200 mil ug laing P50mil nga hinabang ngadto sa pamilya ni Silawan.

Nagtoo si Magpale nga ang paghatag og ganti, makatabang sa paspas nga pagtumbok sa responsable sa pagpatay kang Silawan.

“We want to make Cebu an ideal place to live to visit to invest, in other word, including the peace and order situation, so we are here all of us are here to keep Cebu that image and it is so sad, it had to happened karong women’s month,” matud ni Magpale.

Taliwala sa nahitabo, dili gihapon uyon si Magpale nga ibalik ang death penalty.

“I would still believe in rehabilitation,” matud ni Magpale kinsa nanghinaot nga mapaspasan ang pag- sulbad sa kaso ug madakop ang responsable sa krimen.

Marso 11 dihang napalgan ang lawas ni Silawan nga nabulit og samad dinunggaban ug gipanitan na ang nawong diha sa nahisgotang dapit. Wala na kini sapot sa ubos nga bahin sa lawas. (Rowena Capistrano, Romeo Limpangog ug Le Phyllis F. Antojado/IBM)(BANAT NEWS)