CEBU, Philippines – Nagtingkagol karon sa bilangguan ang 19-anyos nga uyoan human niya gipanamastamasan ang iyang 6-anyos nga pag-umangkon human niya gihaylo og junkfood, niadtong Martes sa hapon sa Lungsod sa Barili.
Ang suspek nga usa ka ulitawong mananagat taguon lang sa pangalan nga Jeric samtang ang bata taguon sab sa ngalan nga si Angel, tinun-an sa kinder ug anak sa igsuon sa suspek.
Asoy ni PO3 Mark Anthony Fat nga nagduwa ang bata uban sa iyang manghud dihang gitawag kini sa iyang uyoan kay hatagan og junkfood apan gidala kini sa underground sa balay.
Giingong didto sa underground, giduwaan sa uyoan ang kinatawo sa iyang pag-umangkon gamit ang iyang kamot ug dila.
Sa imbestigasyon sa kapolisan, giingong naundang lang ang tinguha ni Jeric dihang gipangita ang bata sa inahan.
Matud ni PO3 Fat nga sa dihang nakabalik ang bata sa iyang inahan, didto na kini mitug-an hinungdan nga misumbong dayon sa polis ang inahan niini.
Ang uyoan wala mopalag sa dihang gisikop sa kapolisan ug gipriso na kini karon ug gipaabot kasong pagpanglugos.
Gipasusi na usab sa pink room sa Vicente Sotto Memorial Medical Center ang bata aron masayran ang kadaut nga nahimo sa iyang uyoan. (/DILT)(BANAT NEWS)