Pagpanghatag og bugas di pamulitika — Margot

CEBU, Philippines —  Gitubag ni Cebu City councilor Margarita Osmeña ang pasangil nga usa ka pamulitika ang pagpanghatag sa syudad og libreng bugas ngadto sa mga Habal-Habal drivers.

Ang mga drayber sa Habal-Habal o motorcycle-for-hire nakadawat og tagsa ka sako nga bugas humay isip tabang kanila sa kagamhanan sa syudad human sila wala  makapamasahero dihang gisuspenso sa Korte Suprema ang operasyon ilabi na sa 'Angkas'.

 “We know that Tommy (Osmeña) went to Manila to appear before the committee and even before that last year, it was not something that he decided to do just now but it was something that he truly believed in and it started even way before this current issue came up so it is consistent, if they brand it as political so be it”, matud pa ni Margot Osmeña. Sa ilang bahin, makita sa mga panagway sa mga motorcycle-for-hire ang dakong kalipay human ilaha nang nadawat ang tag usa ka sakong bugas.

Usa sa nakadawat og usa ka sakong bugas mao si Teody Mancera, 29 anyos, residente sa Basak San Nicolas Pardo, usa ka tuig na miyembro sa Angkas. Dako kaayo ang iyang pasalamat sa bugas nga nadawat kay dako kini og tabang nila sanglit gamay nalang palitunon sa  balay.

Kini miingon nga dismayado kaayo sila dihang gisuspenso sa Korte Suprema ang operasyon sa Angkas lukop nasud gani nagproblema sila sanglit wala sila’y panginabuhian.

“Manghinaot sad nga ma-okay na ang habal-habal ug Angkas, ma-legal na gyud siya ba kay lisod kaayo kaning amoa baya is kaning sa amoa ra sad ning pamilya, panginabuhi nga tarong ba”, ni Mancera pa.

Sa wala pa nag-Angkas ang nahisgutan trabahante kini sa usa sa mga dakong mall sa siyudad, apan nakadesidir nga mag Angkas gumikan kay dako sab ang ilang kita.  LPM (BANATNEWS)