Drayber sa habal-habal nibangga sa koral patay
CEBU, Philippines — Patay ang us aka 31-anyos nga habal-habal driver human kini nalahos ug nibangga ngadto sa koral diha sa nasudnong dalan sa Barangay Suba, Lungsod sa Samboan niadtong Miyerkules sa gabii.
Ang namatay mao si Dione Desor Cuevas, taga Banilad, Bacong Negros Oriental ug kasamtangang nagpuyo sa Sitio Punong Barangay Poblacion, Samboan.
Matud ni Senior Police Officer 2 Bethoven Rocamura, Jr., chief investigator sa Samboan Police Station nga giingong gikan nag-inom si Cuevas diha sa Lungsod sa Ginatilan kauban ang anak sa iyang amo nga si Edward Silor.
Sakay sa managlahing motorsiklo ang duha diin si Cuevas nagmaneho sa Honda XRM nagtangag sa plakang 8822 XW nga gipanag-iya ni Merlina Silor, inahan ni Edward.
Gibana-banang 500 metros gikan sa balay nilang Silor giingong nawagtangan og kontrol sa manobela si Cuevas diha sa kurbadang bahin ug nalahos ngadto sa sementadong koral ug nabunal ang ulo. Giingong posibleng wala masuhito sa dalan si Cuevas sanglit bag-o pa kini sa lugar.
Daling gidala diha sa Rural Health Unit sa Samboan si Cuevas apan gideklara kini nga patay na nga naabot sa RHU ni Dr. Ryan Delima. BDB (BANATNEWS)
- Latest
