Mandaue, Lapu-Lapu i-downgrade ang EWAS category

CEBU, Philippines – Ang Dakbayan sa Mandaue ibutang na sa green category sa Election Watchlist Areas (EWAs) human sa gihimong peace covenant ug mga election forum sa mga mokandidato sa umaabot nga midterm elections ug daku ang posibilidad nga mapaubsan sab ang kategoriya sa Siyudad sa Lapu-Lapu.

“Just like in Mandaue, we are ready to downgrade from orange to yellow (then) to green kasi continuous tong dialogue nila didto. Ang Lapu-Lapu, maybe we can downgrade to yellow,” matud pa ni Police Regional Office-7 director Debold Sinas.

Apan iyang gitin-aw nga hayan mosaka na sab ni og balik kon adunay kakuliang mahitabo subay sa piniliay.

Nasayran nga ang maong mga dakbayan gibutang sa orange code nunot sa intense political rivalry sa mayoralty, rivalry sa mga supporter ug sa posibleng presensya sa armed group.

Ang Dakbayan sa Sugbo nga anaa sa red category, giingong kasamtangang gitrabaho pa sa kapolisan ang mga peace dialogue tali sa mga magpapili.

Samtang ang Lungsod sa Tuburan nga gibutang sab sa red code giingong hanap pa nga ma-downgrade kini bisan pa man og adunay paningkamot nga mag-peace covenant signing, gumikan kini sa padayong presensya sa armadong grupo.

Wala pa matino kon kanus-a ang sunod nga Joint Peace and Security Coordinating Council (JPSCC) kauban sa armadong kusog ug sa Comelec kabahin sa seguridad sa midterm election karong Mayo. (/DILT)(BANAT NEWS)