Duha gipamusil patay

CEBU, Philippines — Duha ka mga lalaki nga gidudahang nalambigit sa ilegal nga drugas ang gipamusil patay sa managlahing hitabo sa mga dakbayan sa  Mandaue ug Talisay sa miaging gabii ug kagahapon sa kaadlawon.

Si  Police Officer 1 Ronnie Padios sa Presinto 5 sa Mandaue City Police Office miila sa biktima nga mao si Renato Gilig  Baculao, 33, nga kanhi drug surrenderree.

Matud pa ni  Padios duha ka mga motorsiklong may upat ka mga lalaking sakay ang nihunong atubangan sa balay sa biktima ug ang duha misulod sa panimalay sa biktima ug didto gipaulanan kini og bala.

Human sa pagpamusil, daling nibiya ang mga mamumuno sa wala mahibaw-ing direksyon. Patay dihadiha ang biktima.

Gisusi pa kun may kalambigitan sa ilegal nga drugas ang kamatayon sa biktima.

Samtang sa Dakbayan sa Talisay, usa ka gidudahang tiggamitan og ilegal nga drugas ang gipatay sa Sitio Mananga II, Barangay Tabunok, Dakbayan sa Talisay kagahapon sa alas 3 sa kaadlawon.

Sayo nianang kaadlawon adunay nadungog nga butobuto sa armas apan hayag na ang adlaw sa dihang nadiskubrehan ang patay’ng lawas sa wala pa mailhing biktima.

Sa pakisusi sa Scene of the Crime Operative (SOCO) sa patay nga lawas aduna kini daghang samad pinusilan ug may usa ka paketeng gituohang shabu nga nakuha gikan niini.

Gituohan sa kapulisan nga ilegal nga drugas ang motibo sa pagpatay. (Gabriel Bonjoc/IBM)(BANATNEWS)