Bukirang lugar ug kasapaan sa Talisay gi-monitor

CEBU, Philippines – Gi-monitor sa Dakbayan sa Talisay ang pipila ka bukirang barangay sa siyudad nga mga landslide prone area o delikado sa pagdahili sa yuta gumikan sa pipila ka adlaw nga nagsige ang uwan.

Matud ni Dr. Jomar Rubio, executive secretary ni Mayor Eduardo Gullas nga standard operating procedure gyud nila nga basta kong dili maayo ang lakat sa panahon o sagunson ang uwan ipaalerto dayon nila ang mga barangay ilabi na sa bukiran. Iyang giila ang mga barangay nga delikado sa pagdahili sa yuta mao ang Manipis, Jaclupan ug ang Campo 4.

Gibutyag ni Rubio nga ilahang nasabutan sa matag barangay nga kong dili maayo ang lakat sa panahon alerto usab sila ug motawag kong aduna sila’y marespondehan aron matabangan.

Gawas sa mga bukirang barangay gibantayan usab ang mga kasapaan gikan sa barangay Jaclupan, Lawaan 3, Lagtang, Tabunok, San Isidro ug Dumlog isip pangandam usab kong ugaling adunay mahitabong baha og pagsaka sa tubig sa sapa.

Ang Sugbo nakasinati karon sa amihan nga nakamugna og mga pag-uwan sulod na sa pipila ka adlaw.

Sa laing bahin, gilauman nga maayong panahon na ang masinati karon kompara sa mga nanglabay’ng adlaw diin nasinati ang mga pag-ulan matud sa Philippine Atmospheric, Geophysical and Astronomical Services Administration (PAGASA)-Mactan.

Si Vhan Singson, weather specialist sa PAGASA-Mactan nagkanayon nga ang mga pag-ulan hinungdan kini sa northwest monsoon o amihan nga nagdala og hinay ngadto sa kasarangan nga pat-ak pat-ak sa ulan.

Pasabot ni Singson nga gumikan kini sa nipis nga panganod hinungdan nga magbalik-balik ang pag-ulan.

Makasinati og hinay ngadto sa kasarangang hangin ug baluron nga kadagatan ang Central Visayas. (Joevelon G. Pinay/BDB)(BANAT NEWS)