Seguridad sa Olango pahugtan

CEBU, Philippines – Ang direktor sa kapolisan sa Dakbayan sa Lapu-Lapu Senior Superintendent Limuel Obon nibisita sa Isla sa Olango sa nilabay’ng adlaw aron makig-alayon sa mga opisyal sa kabarangayan sa isla ug sa mga residente niini  alang sa pagpahugot sa seguridad sa maong lugar.

Matud ni Obon nga iyahang gisiguro ang pagpahugot sa seguridad sa isla tungod sa posibilidad nga mahimo kining gamiton isip transient o entry point sa mga armadong grupo gikan sa Mindanao ug ginadiling drugas.

Ang mga opisyal sa 11 ka barangay sa isla giawhag ni Obon nga moumol og purok system ug magtudlo og mga purok leader aron dali lang maila ang mga residente sa ilang lugar.

Gipasabot ni Obon nga ang tumong sa iyang pagbisita mao ang pagsiguro nga madasig usab ang mga lumolupyo sa pagpakighiusa sa kapolisan  sa pagbantay sa daplin sa kadagatan batok sa mga dautang elemento ug kabahin usab kini sa programa sa kapolisan nga Targeting Hardening.

Matud usab ni Obon nga ubos sa Target Hardening program ilahang gidasig ang mga lumolupyo sa paghimo og koordinasyon sa kapolisan ilabi sa pagtaho dayon kong aduna sila’y mabantayan nga mga tawo nga mga kadudahan og lihok. (Romeo T. Limpangog/BDB)(BANAT NEWS)