Mga politiko naapil sa drug list sa kapolisan?

CEBU, Philippines – Ang kapolisan sa Ozamis City giingong nihatag og listahan sa mga pangalan sa mga politiko sa kabarangayan ug siyudad nga giingong protector sa ginadiling drugas ngadto sa kapolisan sa Dakbayan sa Mandaue.

Ang pipila ka opisyal sa kabarangayan ug sa Siyudad sa Mandaue nipadayag nga buot nilang mabutyag ang maong mga pangalan.

Samtang ang direktor sa Mandaue City Police Office (MCPO) Senior Superintendent Julian Entoma niklaro nga walay naapil sa maong listahan nga mga kandidato sa 2019 election.

Matud ni Entoma nga mopahigayon pa sila og validation sa maong listahan nga ilang nahuptan.

Sa nasayran sa maong taho sa kapolisan nga  giingong pipila sa mga sakop sa Parojinog group  ang nagtago sa dakbayan pinaagi sa pag-abang og panimalay nga gihimo niining bodega sa ilegal nga drugas.

Nagsugod ang pagtumaw sa maong taho human usab sa pagkasikop sa mga sakop sa  Regional Special Operations Group  sa pusher nga si Charlie Duhaylungsod Fortuna  ug nasakmit gikan kaniya ang P48 milyones nga kantidad sa shabu diha sa sulod sa giabangan niining balay sa  Vista Montana Subdivision sa Barangay Casili, Dakbayan sa Mandaue.

Gikataho nga si Fortuna giingong adunay kalambigitan sa pusher nga si Romy Ramas nga adunay koneksiyon sa Parojinog group sa Ozamiz City kinsa nabilanggo karon sa Mandaue City Jail. (/BDB)(BANAT NEWS)