223 ka sakyanan ang na-clamp atol sa Sinulog

CEBU, Philippines – Niabot ngadto sa 223 ka sakyanan ang na-clamp  sa Cebu City Transportation Office (CCTO) gumikan sa illegal parking gikan sa Enero 10 hangtud sa Enero 20.

Ang operations chief sa CCTO Francisco Ouano nagkanayon nga adunay mga drayber nga wala nag-obserbar sa saktong parking hinungdan nga ang traffic aides daling ni-clamped sa ilang sakyanan.

Sagad sa mga sakyanan nakalapas sa “no parking policy” duol sa Basilica Minore del Santo Niño.

Dali nga nasakpan sa CCTO ang maong mga sakyana gumikan sa deployment sa 40 ka traffic enforcers.

Matud ni Ouano nga ang mga nakalapas dili residente sa siyudad sagad kanila gikan kini sa silingang mga probinsiya ug dakbayan.

Nunot sa maong na-clamped nga mga sakyanan ang CCTO nakakolekta og P335,500 nga multa sulod sa nahisgutang mga adlaw.

Niadtong Enero 10 hangtud sa Sinulog grand parade ang mga drayber gidid-an nga mo-parking sa mga sakyanan diha sa Sinulog route ug duol sa Basilica Minore del Santo Niño.

Matag Sinulog ang CCTO dili motugot sa bisan unsang klase sa sakyanan nga mo-parking diha sa pipila ka lugar ilabi na sa downtown area.

Ang gitagana nga parking area naglangkub sa dakong hawan sa Compania Maritima ug dalan Legaspi.

Alang sa sunod tuig nga selebrasyon si Ouano nagplano nga mangita og laing parking area aron pag-accommodate og daghang sakyanan tungod kay ang existing parking areas maka-accommodate lang kini og 100 ngadto sa 150 ka sakyanan. (/BDB)(BANAT NEWS)