Tanod target sa buy-bust napatay

CEBU, Philippines – Patay ang usa ka barangay tanod sa Lungsod sa San Fernando nga target sa buy- bust operation apan giingong nakigpinusilay hinuon sa mga polis niadtong Lunes sa gabii.

Ang nakalas naila nga si Joel Bacalso, barangay tanod sa North Poblacion sa maong lungsod.

Matud pa ni Police Officer 1 Mark Steve Olan-Olan, Desk Officer sa San Fernando Police Station nga nakahinabi sa Banat News, ang ilang hepe, Police Chief Inspector Lymel Pasquin mipahigayon og operasyon batok sa suspek human sila nakadawat og impormasyon nga namaligya kini og ilegal nga drugas.

Tuod man nahitabo gyud ang transaksyon apan gikatahong nakabantay kini dayon nga ang nipalit kaniya mga polis ug daling niibot og armas ug gipusil ang polis apan nikagar ang armas.

Sumala pa ni Olan-olan diha-diha naunhan kini pagpusil sa mga polis. Gidala sa tambalanan sa Dakbayan sa Carcar apan gideklarar kining patay na.

Dugang pa ni Olan-olan, nasakmit nila gikan kang Bacalso ang kalibre .38 nga armas ug upat ka bala lakip ang mga pinutos sa ginadili nga drugas. (/IBM)(BANAT NEWS)