Magtiayong reluya gi-ambush
CEBU, Philippines – Magtiayong mayor ug ABC President sa Lungsod sa San Fernando gi-ambush diha sa Cebu South Coastal Road sa Barangay Linao sa Dakbayan sa Talisay kagabii.
Ang gi-ambush mao ang magtiayong sila si Mayor Lakambini “Neneth” Reluya ug ang bana niining si ABC President Ricardo “Nonoy” Reluya Jr. kauban ang ilang duha ka bodyguards ug drayber.
Sumala pa sa gipakitang mensahe ni Supt. Marlu Conag, hepe sa Talisay City Police Station nga ang nakalas mao ang bana sa mayor, ug ang ilang duha ka mga kaubang sila si Allan Bayot ug Ricky Monterona.
Samtang luwas ang mayor ug silang Giovanni Perez ug Tolentin Jiffer nga kauban sa mayor nga gidala sa Talisay City District Hospital.
Matud pa sa pasiunang impormasyon nga gihatag sa kapolisan kagabii, ang mga biktima luwan sa usa ka Super Grandia van nga may plakang VY-8687. Giingong sa lungsod pa lang sa Minglanilla gituohang gisundan ang mga biktima.
Ang mga biktima gikatahong gikan pa sa lungsod sa San Fernando ug padung na mamauli sa ilang balay sa Cebu City sa dihang kalit silang gipaulanan og bala sa mga armadong mga lalaki pag-abot sa maong dapit.
Usa sa mga nakasaksi nga si Felix Bocog, police auxiliary sa Talisay City Police nga naatol nga nagsunod sa van nga gisakyan sa mga Reluya mitug-an nga nakita niini ang usa ka puting Innova nga nibabag sa maong van ug gipusil ang drayber sa van. Nabangga ang van sa usa ka poste sa signage kilid sa karsada hinungdan nga kini nahunong ug dihadiha nanganaog sab ang tulo ka mga sakay sa Innova nga nagtaptap, nagsuot og vest ug armado og tag-as nga armas ug girakrakan ang van pag-usab.
Sunod nga nakita ang nagkadugo nga si Mayor Reluya uban sa laing duha ka mga lalaki nga pulos sab samdan nangayo og tabang.
Samtang giingong may lalaki usab nga giingong naglingkod sa waiting shed duol sa nahitaboan ang naigo sa saag nga bala diha sa tiyan ug gidala sab sa tambalanan.
Padayon pang gisusi sa kapolisan ang motibo sa maong pagpamanhig. Daan nang namahayag ang mga Reluya nga gibati sila og kabalaka tungod sa mga nadawat nilang pagpanghulga sa ilang kinabuhi. Sa pasiunang impormasyon nga nakuha ni Conag, politika ang motibo sa maong pagpamanhig base sa pangangkon sa mayor.
Samtang aduna pay laing nahitabong pagpamusil nga nahitabo sab sa Barangay San Isidro sa mao gihapong siyudad kagabii apan gisusi pa kun konektado ba kini sa nahitabo sa mga Reluya. (Rowena Capistrano/IBM)(BANAT NEWS)
- Latest