‘Drug overdose’ dili pa kumpirmado

CEBU, Philippines – Mohimo og imbestigasyon ang Cebu City Police Office (CCPO) kun unsa gyud ang tinud-anay nga nahitabo sa 19-anyos nga dalagita kinsa namatay human mitambong og concert niadtong Sabado, Enero 19.

Matud ni CCPO director PSSupt. Royina Garma wala pa nila nakumpirmar kon party drug ba gyud ang rason sa kamatayon sa maong batan-on. Hinuon iyang giasoy ang gihatag nga impormasyon sa iyang sakop nga adunay nadiskubrehan ang doctor nga substance nga posibleng mao ang rason sa kamatayon sa dalagita. Apan ila pa kining kumpirmahon ug susihon kon unsa kini nga klase sa substance, kon component ba sa party drug.

“For now, we are already conducting the investigation but we need the full cooperation of the family because we have to establish the background of the victim, gumagamit ba siya dati o hindi, sino yung mga associates niya, sino mga kasama niya pumunta dun sa party at kung pinilit ba siya uminom or voluntarily uminom, doon ba nakainom or dati ng nakainom, or baka nailad, something mga ganun, tingnan natin kung may crime na nangyari kaya we will investigate”, matud ni Garma.

Ang director midugang nga wala sila’y impormasyon nga naghitak ang party drugs sa Siyudad sa Sugbo. Apan aduna kini impormasyon nga adunay mga class A nga parties ug dili lang kini sa siyudad, lakip na sab sa ubang bahin sa nasud.

Si Police Regional Office (PRO)-7 director PCSupt. Debold Sinas miingon nga naghuwat sila sa pamilya sa namatay nga mosang-at og reklamo aron ilang mapatawag ang organizer alang sa imbestigasyon.

“That’s why we’re waiting for any complaint para ipatawag namo ang organizer.

Kung wala kasi complaint, unsa man among basis para ipatawag sila? We have also informed the city councilor nga kung wala’y complaint dili pud maghatag og report sa ilaha. Unsa man to himo-himo lang namo?.” pamahayag ni Sinas.

Si Konsehal Dave Tumulak, ang tsirman sa Committee on Public Order and Safety miingon nga wala siyay nadawat nga taho mahitungod sa party drugs.

Iyang gipahibawo nga aduna nay kabanay sa dalagita ang mipadala og mensahe kaniya ug kini miingon nga sila mismo nagduda sa pamahayag sa kauban sa namatay. Apan giingnan kini sa konsehal nga maghuwat una sila sa resulta sa gihimong pakisusi sa doktor ug sa pamahayag sa  ginikanan sa dalagita.

“We should also respect the parents, kay naa naman gud sa social media kay mura man gud og na-accuse ta daan. Kato siya matawag to nga victim mao nga luoy pud kaayo nga moderetso ta nga mao toy atong i-alleged. Naghuwat lang ta unsay tuyo, unsay gusto sa ginikanan ug pananglitan moduol sila sa kapolisan, moduol sila sa city government we will take actions on it”, matud pa ni Tumulak. (/DILT)(BANAT NEWS)