Sinulog grand parade nilapas sa gitinguhang oras

CEBU, Philippines — Gisugdan sa usa ka Santos nga Misa sa alas 8:00 sa buntag diha sa Cebu City Sports Center ang pagpahigayon sa Sinulog grand parade kagahapon.

Si Monsignoy Roberto “Boy” Alesna ang nisaulog sa maong misa.

Human sa misa, mga alas 9:00 sa buntag gisunod ang street parade sa 24 ka contingent nga apil sa Sinulog grand prade, mga float, puppeteers, higantes ug guest performers.

Ang mga nipasundayag kagahapon sa Sinulog based category gilangkuban sa Sapandaku, Inayawan, Labangon, Guadalupe, Day-as, Carcar City, Bogo City, Talisay City ug Murcia, Negros Occidental.

Samtang sa free interpretation category gilangkuban sa Tribu Higaonon San Nicolas Proper, Mambaling, Talamban, Basak San Nicolas, Mabolo, Suba, Sawang Calero, Cogon Pardo, Ginatilan, Consolacion, Daanbantayan, Placer Surigao Del Norte, Province of North Cotabato-Kalivungan Festival, La Catuerba 3 ug Liloy Zamboang del Norte.

Ang mga guest performer mao ang Tangub City, Provincial ug Cebu City Government, Wonju Dynamic Dancing Carnival, San Diego ug Police Regional Office-7.

Kahinumduman nga tinguha sa Sinulog Foundation Inc.(SFI) nga mahuman ang Sinulog grand parade alas 5:30 sa hapon ngadto na sa alas 6:00 sa gabii.

Apan si Konsehal Dave Tumulak, Sinulog executive committee chairman nagkanayon nga usa rason nga naabot sa alas 9:00 sa gabii ang pagkahuman ang Sinulog grand parade gumikan sa uwan nga dala sa bagyong Amang diin ang mga dancer nagpadaplin .

Laing hinungdan ang gidaghanon sa mga tawo nga nitan-aw diin naghuot kini.

Human makasayaw ang mga performer gisunod dayon ang fireworks nga giatngan usab sa mga manan-away. (BANAT NEWS)