CEBU, Philippines — Gidakop atol sa police checkpoint sa Barangay Aguho, Daanbantayan ang nagpailang security escort sa usa ka kongresista sa amihanang Sugbu nga naatol usab sa pagsugod sa election gun ban sugod kagahapon sa alas 12 sa kaadlawon. Ang maong dinakpan giila nga si Richard Monsanto 41, taga barangay Curva, lungsod sa Medellin. Nakuha gikan niya ang usa ka kalibre .45 nga armas ug ang pito ka mga bala niini.
Sumala pa sa bag-ong hepe sa Daanbantayan Police station nga si Police Chief Inspector William Homoc nga alas 12:33 sa kaadlawon kagahapon nasikop sa COMELEC (Commission on Election) check point nga gibutang sa maong barangay si Monsanto nga nagsakay sa iyang XRM nga motorsiklo.
Sumala pa nga pagkamatikod niini nga adunay checkpoint sa unahan giingong miaksyon kini sa pagbalik sa agi apan nababagan.
Ang maong dinakpan nangrason nga nakalimot kini nga sugdan ang gun ban kagahapon. Gisubay karon kun aduna bay lisensya ang maong armas apan pasakaan gihapon si Monsanto og kasong pagpanglapas sa election gun ban. Ang gun ban molanat pa hangtud sa Hunyo 12, human sa piniliay.
Una nang gipahibalo sa direktor sa Police Regional Office-7 nga si Chief Supt. Debold Sinas nga aduna silay ihatag nga ganti sa estasyonan sa polis nga makauna og dakop og nakalapas sa election gun ban. Niining pagsuwat wala pa hinuoy kompletong datos sa tibuok rehiyon syete kabahin sa kun kinsa ang nakauna, apan sa tibuok probinsya ug Dakbayan sa Sugbo ang Daanbantayan ang nakauna.
Niadtong Sabado sa buntag pa nadestino si Homoc sa maong lungsod human giparelibohan ni Sinas ang tibuok pwersa sa Daanbantayan police. (BANAT NEWS)