CEBU, Philippines — Mipadala og komunikasyon ngadto sa Department of Education sa rehiyon ang hepe sa kapolisan sa Dakbayan sa Sugbo kabahin sa gipatuman nga “No Backpack Policy” sa tanang buot mosulod sa Basilica Minore del Santo Nino ilabi na sa mga estudyante.
Si Cebu City Police Office director Police Senior Supt. Royina Garma, mipadala og suwat kang DepEd-7 regional director Juliet Jeruta ug adunay kopya niini ang Schools Division Superintendent sa dakbayan nga si Dr. Bianito Dagatan aron sa pagpahibalo nga gidili ang pagdala og backpack.
Ang maong sulat nga gipadala ni Garma nagkanayon nga tungod sa bagang duot sa katawhan nga modagsa alang sa kapistahan, ilang gipalapdan ang pagpatuman sa kahapsay ug kalinaw ug usa niini ang pagdili sa pagdala og backpack sa sulod sa Basilica, apan daghan gihapon ang wala motuman niini.
Sumala ni Garma nga kasagaran sa mga terorista, magdala og backpack, hinungdan ila kining gidiskarids ang pagdala niini sa simbahan o sa mga lugar nga adunay kalihukan subay sa Fiesta Senyor aron dili malangay kay moagi kini og makuti nga inspeksyon. Nunot niini, giawhag sa police director ang kadagkuan sa DepEd nga pahimangnuan ug pahibaw-on ang ilang mga tinun-an kabahin niini. Malaumon si Garma nga suportaran kini sa DepEd. (/DILT)(BANATNEWS)