Kaso sa Dengue sa Central Visayas nisaka

CEBU, Philippines — Nisaka ngadto sa 44 porsiyento ang kaso sa dengue base sa natala sa Department of Health (DOH) sa tibuok rehiyon-7 gikan Enero 1 hangtod Disyembre 22 sa miaging tuig.

Niadtong Enero 1 hangtod Disyembre 22 sa tuig 2017 adunay 13,457 ka kaso ug 119 ang namatay samtang sa miaging tuig sa samang buwan adunay 19,342 ka kaso ug 122 ang namatay.Kasagaran sa mga kaso nagagikan sa Dakbayan sa Sugbo nga adunay 2,744 nga kaso sa tuig 2017 ug 33 ang namatay ug sa miaging tuig adunay 3,088 nga natalang kaso ug 16 ang namatay.

Gisundan kini sa Dakbayan sa  Lapu-Lapu nga 1,224 ka kaso ug 13 ang namatay sa 2017 ug 1,788 ka kaso ug 4 ang namatay usab sa miaging tuig.

Sa Dakbayan sa Mandaue adunay 928 ka kaso ug 4 ang namatay sa 2017 ug 1,141 ka kaso ug 2 ang namatay sa miaging tuig.

Sa Dakbayan sa Tagbilaran adunay 211 ka kaso ug 2 ang namatay sa 2017 ug 721 ka kaso ug 10 ang namatay sa miaging tuig.

Ug sa Dakbayan sa Toledo adunay 286 ka kaso ug 1 ang namatay sa 2017 ug 494 ka kaso ug 6 ang namatay sa miaging tuig.

Sa mga probinsiya sa rehiyon sa  miaging tuig gikan sa Enero 1 hangtod sa Disyembre 22 adunay natala nga 52 ang namatay sa Bohol, sa Cebu adunay 55 ang namatay, sa Negros Oriental 12 ug sa Siquijor 3 nga namatay.

Si Dr. Shelbay Blanco, Health Emergency Management Staff (HEMS) coordinator sa Department of Health (DOH-7) nagkanayon nga taas ang kaso sa dengue sa miaging tuig kompara sa tuig 2017 gumikan kay nitaas ang kaso sa Bohol.

Giklaro ni Blanco nga kabahin lang sa dengue ang mga kaso ug walay kalambigitan sa bakuna nga Dengvaxia.

Si Blanco midugang nga ang pag-apply sa 4S o search and destroy breeding places, secure self-production, seek early consultation ug support fogging/spraying dako og ikatabang batok sa lamok nga nagdala sa maong sakit.

“We still go to the basics of prevention gihapon sa dengue, 4S gihapon. Pabalik-balik man na siya pero dako gyud siya og impact if the community will just promote cleanliness sa ilahang surroundings; the neighborhood itself will cooperate and intensify the campaign, mabatukan gyud na nato ang dengue,” matud ni Blanco. (BANAT NEWS)