Politiko gipanghimangnuan ni Palma

CEBU, Philippines — Si Cebu Archbishop Jose Palma subling mipahimangno sa mga buot magpapili sa umaabot nga piniliay nga kinahanglan puy-an nila ang kinabuhi pinaagi sa paghatag ug tinuoray nga serbisyo.

Ang maong pahinumdum sa arsobispo gihimo atol sa iyang misa sa New Year’s Day diin matud niini nga himoon nga modelo sa mga politiko si Kristo nga miari sa kalibutan aron sa pag-alagad ug dili magpaalagad.

Sumala ni Palma nga angay tan-awon sa mga politiko ang mga hiyas ug birtud sa ilang kasingkasing alang sa sinsero ug tinuoray nga pagserbisyo sa tanang katawhan nga walay gipili.

Gitug-an sa arsobispo nga angay usab huptan sa mga politiko ang kalinaw diha sa ilang kasingkasing aron ila kining mapakaylap ngadto sa katawhan ug dili usab kalimtan ang pakighinabi ug pagpaminaw sa ilang isig kaingon aron mopatigbabaw ang kalinaw.

Awhag usab niini nga dili kalimtan ang paghatag ug pagpakabana  sa kalikupan base usab sa panawagan ni Pope Francis. (/DILT)(BANATNEWS)