CEBU, Philippines — Suportado gihapon ni Mayor Eduardo Gullas sa Siyudad sa Talisay ang hepe sa kapolisan niini nga si PSupt. Marlu Conag bisan pa man sa nahitabong patay sa dakbayan karong tuiga.
Base sa rekord sa kapolisan, miabot sa 36 ka tawo ang namatay nga nalambigit sa ilegal nga drugas.
Matud ni Mayor Gullas nga nakauyon siya sa trabaho sa kapolisan apan gikinahanglan nga palawman pa nila ang ilang intelligence monitoring.
Mitambag ang mayor nga kanunay hunahunaon gyud sa kapolisan ang ilang kaluwasan. Nasayran nga si Conag pabiling officer-in-charge (OIC) sa Talisay City Police. Asoy pa ni Gullas nga kon unsa ang laraw sa kadagkuan sa kapolisan labot sa pagbutang og polis sa ilang lugar iya kining isalig ngadto kanila ug magpadayon ang iyang suporta.
Si Conag mipadayag nga makapadasig ang pamahayag sa mayor hinungdan nga mas tarungon pa nila ang ilang trabaho. (/DILT)(BANATNEWS)